persona

Kailan ka ba titigil?

di’ mo ba naririnig?

sumisigaw na ako.

Kailan ka ba mapapagod?

di mo ba nakikita?

duguan na ako.

 

kailan mo ba hahawiin?

ang tabing na bumabalot sa dilim.

Kailan mo ba ihahain?

ang katotohanang

sabik ng madampian ng mga labi.

 

Kailan ka ba lalabas?

sa aninong pinagkukublihan

Kailan mo ba huhubaran

ang kasinungaling

pilit mong tinatakpan.

 

Hayaan mong marinig ko

ang nakabibinging tunog

kung kasunod nito ay

walang hanggang katahimikan.

 

Hayaan mong maghilom

ang sugat na laging naroon

at bumitiw sa pagkakahawak

sa isang huwad na pag-asa.

 

Hugutin mo ang punyal

na lumalagot sa bawat paghinga

hayaan mong dumaloy ang hapdi at kirot

kung ito’y hudyat ng panibagong simula.